نــرفــزات

تنرفزني اشياء كثيرة بهالحياة ، حبيت أشارككم بعض منها :

تنرفزني حليمة بولند بدلعها المصطنع وثقل دمها اللى يطبق على الصدر ويقمت الأنفاس ،وينزفزني أكثر الناس اللى يشوفونها رمز للأنوثة وأقولهم اذا كانت حليمة رمز الأنوثة بجمالها الصناعي وين راحت سعاد حسني بسحرها الطبيعي وضحكتها السلسبيل أو مارلين مونرو باغرائها الطفولي ؟؟

ينرفزني الجو في هذا الشهر لأنه مثل البشر ماله أمان ومتقلب ، الواحد يخطط ويلبس ويجهز ولما يطلع تنهار عليه السما بثمارها الحجرية او تشيل وتشدخ فيه الريح اللى ما تبشر بالخير ..

ينرفزوني الناس اللى يطقون لك الصدر ويوعدونك بشتى أنواع الوعود ولما تقعد تنطر الفرج منهم يقولون والله ما بيدنا شي أو يتهربون منك وكأنك قاعد تطر ...

ينرفزوني المتعصبين لنوادي اوروبيه مثل برشلونه ومانشستر ويتهاوشون مع بعضهم على كره اصحابها الأساسيين ما يدرون عن الهوا داركم..

تنرفزني قناة "سكوب" بكل الفتن والغسيل الوسخ اللى قاعده تنشره على الملأ جدام الله وخلقة وتشوه صورة الكويت واهلها وتخليهم رمز للهلاقة ..شي يفشل وعلى طاري قناة سكوب أمس حلمت في برنس تشارلز قصدي "سعود السبيعي" ليش ماادري؟!! السموحه مدام فجر ..

تنرفزني فكرة الأجانب اللى ماخذين خير هالبلد ومستولين على حقوق ووظايف عيالها بينما احنا مو لاقيين مكان نتوظف فيه ..!!

تنرفزني فكرة الى طاح الجمل كثرة سكاكينه وان الناس ماعاد فيها خير وينسون كل الزين ويتذكرون الشين بلحظة..

تنرفزني بعض الناس اللى يلبسون أقنعة القسوة واللامبالاة مع ناس يحبونهم بس بسبب خوفهم من الغدر او الجرح أو الوجع من ورا هالمحبة وأقوللهم ترا الكلمة الطيبة صدقة وعامل الناس كما تحب ان يعاملوك ..

تنرفزني طيور الظلام اللى فردت جنحانها على سمانا وقاعد ترجع البلد للخلف در وامنيتها تحويلها الى "قندهار" ثانية .. واقول ارحم ترحم ترا يا جماعة انتوا فاهمين الدين غلط وقمع الحريات هذا راح يجيله يوم وينقلب عليكم ..آميييييييييين

ينرفزني ان كل شي بهالبلد محتاج واسطه واللى ماله ظهر ينداس بشبشب زنوبة وانتوا بكرامه ..

تنرفزني المسجات اللي تزف الينا اخبار خطبة فلانة بنت فلانة بنت علانة على فلان الفلاني أمه فلانه وخدامتهم فلانه وأقولهم آخر همي أخبار المجتمع .. الله يهني سعيد بسعيده واحنا شكو؟؟؟؟

ينرفزني اللى يغلط عليك وبعدين يرجع يتكلم معاك ويتغشمر وكأن شيئا لم يكن ، مايدري انه هالشي يسبب تراكمات وعمره التجاهل ما يحل أي خلاف أو موضوع ؟؟

وايد الأشياء اللى تنرفز لكن مابي انرفزكم أكثر .. ملحوظة هذا الموضوع قابل للتعديل والاضافه خصوصا ان النرفزات ما تخلص ..

اتمنى تشاركوني نرفزاتكم ..

تصبحون على يوم خالي من أي عوامل تنرفز ..